Afnan Abahussain

الصورة مصدرها العم google و أضفت عليها × أحمر وش كبره

لأني حاقده بقوه على الكلية التعيسه

الأسباب كثيره الله يسلمكم إذا بكتب عن المواقف  أعتقد أحتاج دفتر

لكن بختصر لكم  اللي حصل السبت الماضي

سبب الروحه إن إختي بتستلم وثيقتها

كان أول يوم دوامات رسميا و البنات يضبطون جداولهم

‫ نزلنا في البوابه اللي بالمعتاد للطالبات فجأه يوم دخلنا قالت لنا هذي صارت خاصه بالموظفات طيب دخلينا و نطلع من بوابه الطالبات لا‬

‫طبعا انا ما لي مزاجها و لا ابي أتهاوش معها ولا أترجى فيها مشينا

‫تخيلوا نص دوره مشي حول  سور الكليه في عز الشمس‬

‫حسبي الله عليهم

‫بالمعتاد أخلي السواق ينتظر لين اطلع‬

‫لكن لما قال فيني حراره بروح المستشفى قلت له مع السلامه

ولا فيه أحد‬ حولي ذاك الوقت

‫ ما مشينا كل هذيك المسافه مشينا نصها و من رحمة ربي

جتنا صديقة اختي  مع سواقها و كملنا المشوار‬

‫تخلف بتنقلون بوابه موب مع بدايه السنه‬

أو اكتبوا لوحه كبر قريح ان البوابه للموظفات عشان ما ننزل عندها

‬

أبوي لما دقيت عليه يرجعنا‬‬

‫يالله قدرت أوصف له‬

‫يعني من جد وقاحه بوابات وش كبرها للموظفات و البنات بوابه مخيسه و عليها أمه محمد‬

‫وصلت للبيت أحس ما فيني حيل أصلي ولا أسوي ولا شي‬

‫تقول لي امي كلي طيب‬

‫قلت ما فيني حيل آكل‬

‫تعبت كثير  يومها‬

‫و اللي تعبني أكثر و أكثر الزحماااااااااااات‬

‫تخيلوا كليه قابلين فيها أعداد هاااااااااااااااائلة‬

ما أدري كيف حاشرين الآداب كلهم في ذاك المبنى !!

‫ المشكله المبنى غبي‬

‫والله اني دخلت مع البوابه أدور  من  وين أطلع‬

‫حتى لما  لقيت أمن و سألتهم وين بوابه الخروج ما يدرون‬

‫كلن قاعد يمشي على باب الله‬

إذا فيه مكان ممكن ينقل الأمراض فهو هالكليه‬

‫تعرفون اللي زحمااااااااات لدرجه كل شوي تصدمون في أحد‬

‫و عند بوابه الخروج ما تشوفون الا العالم تدف ‬

‫تقول أمي الظاهر ولا الحج‬

‫قلت الحج على الأقل بأجره هذا بوشو‬!!

‬

‫كل شي يسوونه تخلف أكثر من الثاني‬

‫البنات ماخذين الأوراق يخلصونها‬

‫يقولون لها ما عندنا بطاقات مكتبه أساسا تقول

لازم تروحون و تسوون إخلاء طرف من هناك‬ !!

‫و لو سمحتوا وين المكتبه في المبنى القديم اللي صار كليه العلوم‬!!

‫الكليه الثانيه شبه فاضيه‬

‫بنات العلوم أقل بكثير‬

‫يفترض عشان الزحمات على الأقل يبقى قسمين او ثلاثه في المبنى القديم‬

‫لا‬

‬

‫طيب العكس علوم هناك بما إنهم أقل و الآداب يبقون بنفس المبنى لا‬

‫لأن العلوم صعبه ينقلون المعامل‬

‫مع اني ما ودي أحلف إن معاملهم قديمه و تحتاج تجديد‬

‬

‫و ما رضت الأمن تدخلني للعلوم‬

تقول هم بيسوون إخلاء طرف و أنتي ما عندك شي‬

‫ممنوع الزائرات‬

‫أقول في نفسي من زين كليتكم أزورها‬

‬

تحججت لها إني بستفسر من قسم الحاسب

طبعا ما تدري إن القسم خلاص ما عاد يقبل دفعات جديده

أحيانا جهلهم يمشي الأمور

(  رحت قسم الحاسب و سألت و قالوا خلاص القسم بيخرج الدفعات الحاليه و خلاص بيقفل ،  لكن المعلومه هذي أنا عرفتها مسبقا بس عن قولة إني رحت )

‫قالت لي وين إثباتك و عطيتها سجلي الأكاديمي اللي بالأساس ماخذته في شنطتي عشان شغله ثانيه‬

‫تشوفه و تقول أنتي أفنان‬

‫قلت ايه‬

‫تستهبل يعني لو شخص ثاني و معاه الورقه بيقول ايه افنان عشان يفتك من حنتكم‬

جد يسوون نفسهم أذكياء بس عجزوا

‫‫أقول لأختي إن شاء الله هذي آخر مره تجين هالمكان

ما أقول  إلا الله يعين اللي بيداومون فيها بعد شوي و تمر الأيام و تفتكون منها على خير

هالحلطمه كلها نزلت بطلب من الوالده و  سألتني من كم يوم  إذا نزلتها في المدونة أو لا

و الواضح إن خاطرها إني أفش خلقي شوي هنا

(  أمي تكره تعاملهم السيء و أنظمتهم الغبيه )