أسبوع الإجازه

بدايةً أتمنى أن يكون جميع زوار مدونتي الكرام بأطيب حال

طبعاً بسميها إجازه لأنها رسمية للطلاب و المعلمين

ولا بالنسبه لي طول السنه إجازه ما فرقت

أحلى شي وحده من خالاتي جايه الشرقيه من الرياض يوم الثلاثاء = يوم إضافي من عندها

البقيه وصلوا على فترات متفرقه

يوم السبت وصلت خالتي و بناتها التوأم اللي من متى و أنا أحن عليهم حاولوا تجون الشرقيه لكن ربي ما كتب

الحمدلله ربي يسرها لهم هالمره

ما قد جو مسبقاً للشرقيه إلا في المناسبات

من يوم ما دريت إنهم بيجون و أنا أقول لهم حاجزتكم

أحرجونا بكثرة الهدايا

كانت الأيام اللي راحت حلوه الا في شغلتين

الأولى : جدتي تنومت بالمستشفى كم يوم و طلعت

الحمدلله على كل حال

الثانيه : تجمعات الخدم في بيتنا حوموا كبدي

حوستهم واجد و بصراحه ما احب كثرة الخدم خصوصا لما يتصرفون كأنهم هم راعين البيت

وهم موب لك يعني ما تدري وين توديهم!

لا بغيت أسوي شي قلت لأمي صرفيهم برا المطبخ ما أعرف وهم فيه أبراج مراقبه

‫ من اللقافه يجون يلقون نظره وش أسوي

فوق كذا النفس خايسه بعد!

جدتي الثانيه جايه مع خالي من الرياض

من أول يوم الى آخر لحظه راحت فيها و بيتنا استقبالات ما تخلص

طبعاً عارفين هالموال أول يومين مشينا الحال و بعدها ندري إن ما فيه أمل نطلع إذا بنستقبل الزوار فخلينا الشغله ذاك اليوم لأمهاتنا و طلعنا

أول مره طلعنا للراشد أعرف الطريق تماماً ‫

اليوم الثاني واجهة الخبر و أنواع الزحمه

اليوم اللي بعده قبل سفرتهم بيوم واجهة الدمام و يا سلام على ذاك اليوم حاول يوصل للواجهه ما عرف و سواقنا العله ما له خلق يوصف و رسم له كروكي زي وجهه دار فينا شوي و لقينا نفسنا عند البيت من جديد

ما لنا حل إلا ننتظر خالتي الثانيه بتروح و قلنا له وراهم العائلة بترجع البيت و البنات بنروح المول

الحمدلله دل المول من هناك بسهوله لأن الوصف واضح

طيب نبي نرجع بيتنا كيف!؟ راح مع طريق ما أعرفه و لا أذكر قد مرينا منه!

أنواع المغامرات في تجريب الطرق مع سواق أول مره يجي الشرقية خفنا نوصل مكان ثاني قلنا له إسأل أي شخص كيف نوصل لأن كل البنات ما عرفوا الطريق

وصف له شخص كيف يمسك الطريق للدمام الحمدلله وصلنا الشارع الأول و كملت الوصف للبيت

يوم الخميس ودعونا كلهم و رجعوا لبيتهم

‬

على أمل اللقاء مرات قادمه بإذن الله سواء في الشرقيه أو الرياض

‬

‬

‬