على حسابي !

في أحد أيام الخميس كنا مجتمعين مع بنات العم

و بطبيعة الحال أخذتنا السوالف أم فيصل توهم يعدلون بيتهم مع ان النية من قبل ما تحمل و الحين البنت ولدت من فتره

استغربنا ليه ! السبب : هم بالجبيل و مشوار على ما يجيب زوجها الأغراض

الحمد لله أبو فيصل جاب الأغراض باقي العمال يجون يضبطون

فجأه الإسمنت ناقص!؟

إلا يدق جارهم يعطي خبريه انه أخذ كيسين اسمنت

اللي أعرفه إن اللي محتاج شي يستأذن مو ياخذه و يعطي خبريه

أثاري السوالف أكثر من كذا

مره البنت بتروح الدوام الصبح الا بنت الجار تدق مليون اتصال و أم فيصل مشغوله

تقول رديت عليها أحسب عندها شي ضروري

أثاري ما عندها سالفه

تبغى عدسات !

نعم من متى العالم يسلفون عدسات ! صرفتها طبعاً

مره داقه تبغى حلق أحمر

تم تنفيذ الطلب

طيب بعيد عن الوقت الزفت اللي متصله فيه و هم راجعين

تقول ما دريت الا تقول الحلق ضاع كأنها تقول نكته !

ما يخالف كل الثنين ضاعوا!! ما تجي

مره من المرات متصله عليها و مقلقه العالم بوقت غلط معليش يعني وحده متزوجه ما تتصلين بوقت متأخر والله عيب

جبن مورزيللا قالت لها انه مخلص

طيب قامت تتنقى طويلة العمر

على بالها فاتحين سوبرماركت

آخر شي قالت طيب وش عندك عشان تاخذه!

طبعاً تقول هناك أساسا البقالات توصل

و عندها اخوان غير ابوها

لكن تمر جيرانا أحلى

و الطلب الآخر ثلاجات انفجعت بنت عمي قالت كيف بتاخذينها هذي !

آثاري بلهجتهم يسمونها كذا و هي في الحقيقة حافظات الشاي و القهوه

طبعاً تبغى أكشخ شي قالت لها هذا اللي عندي

والله الفضاوه أساسا البنت في الجبيل أيام الأسبوع بس

من يجيها عشان تجيب أشياء كشخه !

طبعاً كل ما ذكر أعلاه يهون عن هذي

مره زوجها عنده إجازه و هي مرتبطه بنشاط صيفي

جاء عندها أخوها و زوجها راح الدمام

اخوها صغير شوي في المتوسط و شكله شوي طفولي

دق الجار العله على أبو فيصل يقول أشوف واحد داخل طالع من بيتك !

ما ادري حرامي ولا شي

معليش التلميحه هذي لشي أكبر بس ما عرف يصرفها

قاله هذا نسيبي

قال ايه صح شكله يقرب لك اشوفه يصلي الفجر معانا

حرامي مطوع ما تجي !!!

طيب يا ألقف خلق الله إذا غصب تعرف من اسأل الولد على طول

ولا دق على أبو فيصل و قل أنا يقتلني الفضول أبي أعرف من اللي في بيتكم

بلاش الحركات اللي ما لأمها داعي !

أعلق أقول لبنت عمي

ناس وجيهم مغسوله بكلوريكس

ردت علي و قالت

كلوركس فلاش ديتول العملاق الاخضر داك تايد بونكس واللي تبين

صح الجار للجار بس عاد استحوا شوي

و احترموا الجيران فيه شي يسمونه ذوق و أخلاق

لكن أظن عند هالعائلة موجود في أسفل القائمة

إن كان موجود من ضمنها أساساً

يا رب تيسر لأبو فيصل و ينقل

الله لا يبلاكم بناس مثلهم